باسيل خلال المؤتمر الوطني السنوي للتيار:
– اسرائيل لتبقى، عندها حلّ واحد: الاعتراف بحق الفلسطيني بدولته، والاعتراف بأرضنا وأمننا ومواردنا، ومش قتلنا وتنكيد عيشنا وضرب اقتصادنا. اسرائيل نقيض لبنان – ولبنان بينتصر عليها بتنوّعه ومقاومته وخصوصاً بقيام دولته، مش باعتماد أجندات مش كلّها صنع لبنان… لمن يشكك نقول: شو بدّكن اكثر من هيك لنقول نحنا بالوجدان معكم؟
– منعرف خطر الفكر الصهيوني علينا كلّنا مسيحيين ومسلمين وحتّى يهود- هيدا فكر غريب عنّا لابس ثياب يهودية، مواجهته ما بتكون بثوب ديني واحد، بتكون بكل القيم الدينية وبالحس الانساني والشعور الوطني
– حرب غزّة نقطة سوداء بسجلّ البشرية ووصمة عار على جبين يلّي بيدّعوا الحضارة وحقوق الانسان. والصهيونية منحاربها بعدّة وسائل، بس احياناً كثيرة كلفة الحرب العسكرية اعلى من كلفة السلام، ومكاسب السلام العادل، اذا توفّرت شروطه، اكبر من الحرب
– الحرب منخوضها كلّنا ومنستشهد فيها لمّا بتنفرض علينا، بس ما بيجوز نحنا نفتعلها، خاصةً اذا كنا محكومين بمعادلة اقليمية ودولية وعلى راسها اميركا وايران والاثنين ما بدهم الحرب تتوسّع… وبمعركة لبنان محشورين بالسلاح الذي يمكن استعماله وبالمدى الجغرافي… وهذا ثمن كبير يدفعه لبنان بالدمار والشهداء… ليش بدّنا نطوّل الحرب عنّا ونربطها بحرب غزّة؟
– مشكلتنا مع “وحدة الساحات” انها ما اخذت بالاعتبار وحدة الساحة اللبنانية. اسرائيل عم تهدّد بالحرب ولكنها رح تخسرها. بس بحذّر انو يوم يلّي بتعرف اسرائيل انه اهتزّت الخلفية اللبنانية الشعبية الحاضنة لحزب الله، بيصير عندها حافز لشن الحرب والأرجح ربحها
– الحدّ الأدنى من تضامن الساحة الداخلية اساسي لتحصيل مكاسب من الحرب. تذكّروا الحدود البحرية! اللبنانيين بيضّحوا اذا المواجهة بتحرّر مزارع شبعا او بترّجع النازحين السوريين او بتضمن استخراج الغاز، من دون ما نذكر بهالمرحلة عودة اللاجئين الفلسطينيين او تسليح الجيش او السلام الشامل، هول لمرحلة ثانية. انّما اقلّ من هيك، حرام نفوّت لبنان بحرب شاملة لنرجع لما قبل 7 تشرين! الحرب اذا وقعت، لازم تاخذنا لما بعد 7 تشرين
– اسرائيل عم تبحث عن انتصار بعد فشلها بغزّة وما رح تتنازل عن مطالبها – كمان حزب الله ما رح يعطي بالتفاوض يلّي ما عطاه بالحرب، وهيدا امر مفهوم. منطقنا وقوّتنا انو اسرائيل هي دائماً المعتدية، ليش بدّنا نخسر قوّة منطقنا؟ حقّقنا بالـ 2006 انتصار ومعادلات ما بيجوز كسرها، واساسها انو اي اعتداء اسرائيلي على اي لبناني هو اعتداء علينا كلّنا ودفاعنا عن نفسنا هو حقّ مشروع
– بالأساسيات التيار ما بيغلّط ولا بيشتّ – يعني اذا الحزب عم يغلّط معنا، ما بتصير اسرائيل صديقة، بتبقى عدو لغاية ما تعيد كل الحقوق لأصحابها. تموضعنا الاستراتيجي ما منغلط فيه، ومطالبنا الوطنية ما منساوم عليها بمكاسب سلطوية
– بدّنا الرئيس الميثاقي السيادي، الاصلاحي والمقاوم، وبدّنا اللامركزية والصندوق الائتماني، والشراكة ما بتتقايض وما لها ثمن. والمعادلة المفروضة مرفوضة: لا منقبل بمرشحّ بيختاروه عنّا ولا منسلّم امرنا لحكومة مبتورة بتحكمنا من خارج الميثاق والدستور. الخيارين غلط: تحكموا من دون شراكة، او نكون غطاء لفشل حكمكم. نحنا منكون سوى اذا في شراكة واصلاح ودولة
– هيدي الحكومة هي تجديد لمنظومة 2005-1990 وهي فاجعة ميثاقية، وبتذكّرنا بزمن الوصاية بس هالمرّة من صنع محلّي. القوّة بتكون لحماية الوطن، وفائض القوّة بيكون ضد العدو، مش غطاء ليتسلّط فريق لبناني على فريق لبناني! باختصار نحنا ما رح نسمح يتكرّر اي شكل من اشكال الوصاية
– لبنان قائم على صيغة تعايش وميثاق تشارك، اذا فُقدوا بيفقد البلد سبب وجوده. التيار حارس الصيغة وحامي الميثاق! نحنا مع لبنان الكبير وكل ضرب للشراكة هو تدفيش المسيحيين نحو خيارات اخرى منرفضها، بس ما تدفشوهم اكثر!
– بهيدا البلد مجبورين نزعجهم لنحصّل حقوقنا، والازعاج بيكون 1 – بموقف موحّد ورافض و2 – بتحريك الرأي العام، وبالنهاية 3 – بالانتقال للعمل المضاد، بدءاً من الشارع وصولاً للعصيان المدني
– كمان باطار العصيان على الواقع ورفضه، ما لازم يبقى حدا ساكت على النزوح السوري – اكيد مش بالاعتداء على النازحين لأن المذنب هو القوى الدولية. 85% من النازحين هم مهاجرين اقتصاديين، و 15% بس هم نازحين امنيين او سياسيين، ومنذكّر المجتمع الدولي انو لنا معه 55 مليار دولار كلفة مباشرة للنزوح ما عدا الكلفة الغير مباشرة. واوعا حدا من برّا يطالبنا بقرش من ديوننا قبل ما يدفع المتوجّب عليه
– الأزمة اليوم ابعد من الحقوق، هي ازمة وجود… وهي بتحدّد علاقتنا مع الآخرين. ما في تحالف ثابت مع حدا بس في تفاهم وين ممكن واختلاف وين لازم
– التيار تعرض لحرب ابادة سياسية، وصار كل واحد فينا او قريب منا مشبوه وبيسألوه بتهكّم: بعدك تيار؟ بعدك عوني؟ جوابنا على راس السطح نعم. نعم، لأنّو نحنا شعلة الحرية، نحنا راية الاستقلال، نحنا القضية والسيادة، نحنا الكرامة والشراكة، نحنا ساحة الشرف. عَ الخيانة قوينا، وعَ لَمعة الكلمة والسيف وعينا… نحنا التيار الوطني الحر…
– نلتقي لنراجع المرحلة الماضية ونخطط للمرحلة المقبلة والتيار بحاجة لعمل
– عملنا السياسي بحاجة لكثير من التواصل مع الناس، من داخل التيار والبلد وخارجهم، وعلى كل المستويات؛ وهالجهد بيصحّح شوي الصورة يلّي تشوّهت بفعل الاغتيال الاعلامي يلّي عم نتعرّض له
– اتهمّونا بالفساد لأن بنهجنا الاصلاحي فضحنا الفاسدين يلّي موّلوا الاعلام ليشوّه صورتنا.اتهمّونا بالطائفيّة لأنّنا وطنيين ومطالبتنا بالدولة المدنية بتضرب طائفيّتهم. اتهمّونا بالصدامية لأنّنا تفاهميين وبالعنصريّة لأننا وحدويين. بس شو بتعمل اذا واحد بدّو يلغيك لأنّك اصلاحي ومدني وتفاهمي؟ بتتصدّى له!
– شو بتريدوا نعمل لمّا بيوّقفوا تمويل معمل الكهرباء كأن الكهرباء لطايفة او لبيت بيّي؟ دخلكم وين صارت كذبة البواخر؟ وكيف برّأنا القضاء؟
– نحنا اصحاب خيار، مش اصحاب رهان. خيارنا هو الدولة والعيش سوا فيها بشراكة كاملة
– ليش خيارنا الدولة؟ لأن الدولة بتجمعنا وبتنظّم حياتنا وبتمنع تفكّك المجتمع والمؤسسات وضرب الوحدة الوطنية
– نطرح ثلاث ثنائيات: 1 – الدولة والعيش سوا- 2 – الوحدة والشراكة – 3- السيادة الوطنية والاستراتيجية الدفاعية
– الهدف ربح الوطن والحفاظ على التيار من ضمنه
– الخطر الوحيد بالمعارضة هو انو نترك دورنا الريادي بتمثيل مكوّن أساسي بالبلد
– التيار ممنوع ينغلق على حاله ولا يقفل باب الخيارات قدّامه
– لازم دايماً نجمع بين المرونة بالسلوك والصلابة بالمبادئ
– سؤال: بالداخل بدّكم جبيل وجونيه وزحلة ودير القمر والقبيات وبشري وجزين ومرجعيون ينغلوا بالحركة والبركة متل البترون المنفتحة للجميع؟ او بتريدوهم محميّات للزعامات ومسكّرين على حالهم لحدّ الاختناق؟
– النموذج اللبناني هو رسالة “العيش سوا”، يعني لبنان الكبير، مش لبنان صغير ومقّسم على قياسات البعض
– بدّكن يانا نفوت بصدام داخلي ليرجعوا أمراء الحرب يعمّروا قصورهم فوق انقاض بيوتكم واليأس يحطّ كلّ اولادكم على طريق الهجرة؟
– أمّا بالخارج، لمّا كانوا ايران والسعودية عم يتقاتلوا، والخليج عم يتصارع مع سوريا على ارضها، نحنا كنّا مع التفاهم بين السنة والشيعة حتى ما ينفجر الصراع عنّا
– ما فيكم لمّا تتقاتلوا تزعلوا منا اذا قلنا لازم تتفاهموا، ولمّا تتصالحوا تتفقوا علينا. مش اذا بتتقاتلوا بتطلع براسنا، واذا بتتصالحوا بتطلع براسنا! نحنا منريد التفاهمات وعم ندفع ثمنها، بس منريد نكون شركاء متساويين لا تابعين ولا ملحقين، لا ذميين ولا استعلائيين
– لبنان الرسالة هو لبنان الشراكة – صورة الشيخ والخوري، الكنيسة والجامع حلوين بس مش كافيين! هالتنوّع موجود بغير بلدان، اما ميزة لبنان فهي الشراكة الحقيقية الكاملة. شراكة ما بتخوّف حدا لأنها ما بتلغي حدا، بتشرك الجميع من دون ما تخرّب، يعني الديمقراطية التوافقية مش الديمقراطية التخريبية
– التفاهمات بتعني ازدهار واستقرار، بس قبل كل شي بتعني شراكة ومناصفة مش واحدة على حساب الثانية. نحنا كان فينا نكون بتحالف طويل عريض عام 2005 بقيادة واشنطن، ولكن لمّا شفنا بدّنا نكون تابعين لتحالف رباعي بين القوى الاسلامية، قلنا لا. قلنا لا لواشنطن بالـ 90 لمّا رادت تلحقنا بسوريا او بالحزب، وقلنا لا بالـ 05 لواشنطن لمّا رادت تفصلنا عنهم… عن شعبنا وجارتنا
– اتفقنا مع الحزب على ورقة موقّعة بتحترم الشراكة والمناصفة والديمقراطية التوافقية، سمحت لنا نصحّح التمثيل السياسي والاداري، ولمّا رجع الحزب عن التزامه بالشراكة، ما تردّدنا نقلّه لا! نحنا مع التفاهم مع واشنطن ومع الحزب بس مش على حساب الشراكة
– المسيحي عنده تحدّي كبير، هو تثبيت الشراكة المتناصفة
– الرئيس عون والتيار صحّحوا التمثيل بس بدّنا نثبّتهم بكل العهود مش بعهد واحد، وبدّنا رئيس يحمل هالأمانة وما يكون موالي لحدا الاّ لناسه وبلده
– بناشد سماحة مفتي الجمهورية ببصيرته والقيادات بالطائفة السنية، بناشد السيّد حسن بصدقه، والرئيس برّي بحكمته، اذا اراد استخدامها عندما يقرر، وبناشد الاستاذين وليد وتيمور جنبلاط بفهمهم للجبل، وكل القيادات اللبنانية ما يفرّطوا بالشراكة المتوازنة والمتناصفة
– بكرّر طلبي من غبطة البطريرك المؤتمن على مجد لبنان انو يجمع القيادات السياسية المسيحية وما في ولا سبب ما نلتقي. وبقول لهالقيادات الوقت مش للمزايدات، ولا للعدائية يلّي عم يظهرها البعض؛ ما في انتخابات بكرا، واصلاً ما حدا بيقدر يلغي حدا– هيدا وهم! ويلّي مفكّر حاله من السبعينات للثمانينات وصولاً للتسعينات، ربح بحذف غيره داخل طايفته، يتذكّر ويتعلّم انو كانت النتيجة خسارة للمسيحيين واضعافهم من دون ربح له
– بناشد القوات والكتائب بإسم آلاف الشهداء وعلى راسهم وبشير الـ 10452 كلم²، والمردة وآل فرنجية الكرام وإرث التضحيات من اجل لبنان– تعوا نحط سوا خط احمر عريض تحت الوجود والشراكة المتناصفة… و لبنان الكبير؛ ونبلّش من هون
– يلّي فكّر حاله سبق التيار عند المسيحيين وهلّق المناسبة يخلص منه، مغلّط! ورح تكون النتيجة خسارة اكثر للمسيحيين. مسار التناحر السياسي لازم يوقف – الاختلاف بالرأي مسموح لا بل مطلوب – التنافس منيح لا بل مرغوب، بس المس بالثوابت وبالحفاظ على الوجود ممنوع
– هيدي معركة وجود الناس يلّي منمثلّهم كلّنا سوا وكل واحد منّا بحجمه
– انا مش عم ادعي لحلف طائفي ضد حدا، انا حريص على تنوّع التيار وفخور اكثر شي بوجود آلاف المسلمين فيه، انا عم ادعي للشراكة بين الكل انطلاقاً من حماية الوجود للكلّ
– في 3 اخطار كبيرة عم تهدّد وجودنا:
الحرب الداخلية او الخارجية والأزمة الاقتصادية بيأسوا الناس وبيدفعوهم للهجرة، وهيدا بيصيب توازننا الداخلي، يعني وجودنا
النزوح واللجوء بيغيّروا تركيبتنا الديمغرافية والمجتمعية وبيضربوا هويّتنا، يعني وجودنا
فقدان الشراكة قدّهم كلّهم واكثر، لأنّه بيصيب علّة وجود لبنان، يعني وجودنا
– شو قيمة حياتنا بلا لبنان المتنوّع وبلا مسلمي لبنان المختلفين عن كل مسلمي العالم ومسيحيي لبنان المختلفين عن كل مسيحيي العالم؟ اصلاً ما في لبنان اذا ما كان متنوّع
– هيدي ارضنا وبدّنا نبقى فيها! فيها تاريخنا وحضارتنا وتراب جدودنا واهلنا وذكرياتنا وكرامتنا وعرقنا ودمّنا… وما منتركها!
– مشروعنا لبنان للبنانيين – لكل اللبنانيين، وما منسمح بالهيمنة على موقع وصلاحيات الرئاسة، ولا منرضى بانتخاب رئيس بيكسر الشراكة والميثاق. الشراكة هي عقد لحماية وجودنا المتنوّع، الشراكة هي تساوي بين كل اللبنانيين على كلّ المستويات
– ناس بتدفع ضرائب ورسوم وناس بتجني ارباح غير مشروعة– المهرّبين والمتهرّبين بيتسبّبوا بإفلاس يلّي بيحترموا القانون وبيدفعوا. وبعد هيك بترفضوا اللامركزية الانمائية الموسّعة والصندوق الائتماني يلّي بيأمّنوا انماء لكل المناطق وخدمات لكل الناس
– الشراكة هي اولاً بتحديد المصير سوا، وهي بالاستراتيجية الدفاعية لنحمي الوطن، وهي بتحييد لبنان عن صراعات هو بغنى عنها. صحيح ما فينا نكون محايدين عن قضية فلسطين بوجه اسرائيل الاجرامية، ولا عن سوريا المدنية بوجه الارهاب الاصولي، بس ما فينا نربط لبنان ونهاية الحرب على ارضه بكل حروب المنطقة وازماتها
– اسرائيل كناية عن مجموعة غرباء عن بعضهم بالجنسية، مش بالدين، تجمّعوا على ارض فلسطين بإسم اسطورة لبّسوها ثياب الدين؛ سردية تاريخية بأطماع استعمارية… هيدا المشروع مهما كان مدعوم، مصيره الفشل مثلما صار بنظام الفصل العنصري بجنوب افريقيا؛ لأن عم يواجهه شعب متجذّر بأرضه وما عنده ارض ثانية ولا جنسية ثانية، وما بيخاف الموت! وعم بيحارب ناس من عدّة جنسيات ما بينتموا لهالأرض، ولمّا بيشعروا بالخطر بيرجعوا على بلدانهم الأصلية يلّي هي بتطالب فيهم متل ما صاير بموضوع الأسرى الاسرائيليين
