أعلنت أسرة عبد الحليم حافظ تدشين موقع جديد، لمشاهدة منزل العندليب ومقتنياته، وذلك من أجل إمتاع الجمهور بمشاهدة إرث الراحل، كما أكدت الأسرة أنها تسعى أيضًا لتوثيق المنزل في منظمة اليونسكو، كأحد أبرز بيوت نجوم الفن.
وكتب أحد أفراد الأسرة منشورا، عبر الصفحة الرسمية لمنزل العندليب عبر فيسبوك، جاء فيه: “بعد غيبة طويلة رجعنالكم بأخبار حلوة، عارفين إننا وحشناكم، وإن فترة قفل “صفحة بيت العندليب” كانت صعبة على كل مُحبيه.. بنعتذر لكم عن الانتظار، وعن أي وقت كنتم عايزين تزوروا فيه البيت ومكانش متاح فيه الحجز، بس كان لازم نغيب شوية عشان نرجع لكم بحاجة تليق بقيمة عبد الحليم حافظ وتليق بيكم، كان صوت عبد الحليم حافظ أكتر من مجرد غُنا، كان نبض بيت مصري، وذاكرة جيل كامل ومستقبل جيل قادم، صوته اتربّى معانا، وكلماته لسه بتزور قلوبنا كل يوم، ولأن تراثه أمانة، أسرة حليم اشتغلوا بحب وشغف عشان يحافظوا على بيته ويخلوه متاح لكل الناس”.
وتابع: “النهاردة وبكل فخر بنقدّم لكم الصفحة الرسمية لمنزل حليم، الفترة اللي فاتت كانت الزيارات بتتحجز عن طريق التليفون أو رسايل الصفحة، وده كان متعب لكتير من الزوار وللأسرة ايضا، علشان كده قررنا نسهّلها عليكم، دلوقتي تقدر تحجز زيارتك بضغطه واحدة من خلال الموقع، لكن الموقع مش بس للحجز، دي هديّة منّا ليكم عشان نعيش سوا إرث العندليب، بمجرد ما تدخل الموقع، فكأنك دخلت بيته الحقيقي؛ كل ركن فيه شايل ذكرى، وكل تفصيلة بتحكي حكاية، هتلاقي فيه رحلة كاملة لحياة عبد الحليم من طفولته، لصعوباته، لشغفه اللي ما انتهاش، ولكل محطة فنية صنعت مجده، وضفنالكم كمان معرض صور للعندليب وبيته، هيخليك تحس بروح المكان حتى قبل ما تزوره فعليًا”.
وأضاف: مهمة خاصة جدا مشروع اليونسكو، عشان نقدر نسجل بيت عبد الحليم حافظ في منظمة اليونسكو كأحد بيوت رموز الفن، محتاجين دعمكم بجد!، بعد زيارتكم، تقييمكم وتعليقكم على “Google Maps” (خرائط غوغل) هو السند الحقيقي لينا. كل “ريفيو” إيجابي بيقربنا خطوة إننا نخلّد اسم العندليب عالميًا.. ونحب نفكّركم: إن البيت هيفتح أبوابه للزيارة يوم 30 مارس، في ذكرى وفاة العندليب، الحجز حصري من خلال الموقع فقط، الزيارة مجانية بالكامل، وهدفنا إن كل محبّ للفن يعيش التجربة دي بنفسه، قبل الحجز، من فضلكم اقرو شروط وأحكام الزيارة علشان نحافظ مع بعض على المكان متاح وآمن للجميع، وفي ختام الكلام، بنهديكم رابط موقع بيت عبد الحليم حافظ https://www.halimhouse.com، الموقع اللي بيحفظ تراث أيقونة الزمن الجميل، من دلوقتي الموقع مفتوح لاستقبال الزوّار، أما الزيارات الفعلية فهنبدأ نستقبلكم من يوم 30 آذار، زوروا الموقع، احجزوا زيارتكم، وخلو التراث يعيش من تاني بصوت عبد الحليم. “
